CINCINNATI – Den wikènt tras di lomba e ekipo di Cincinnati Reds a anunsiá ku nan ta kita Roger Bernadina for di riba nan roster pa hasi lugá pa e pelotero Skip Schumaker. Pa hasi e moveshon aki posibel e ekipo di Cincinnati a designa Roger pa asignashon.
Ku esaki e ekipo tin tempu pa disidí kiko nan ta bai hasi ku Roger. E ekipo ta haña 10 dia pa hasi un di e siguiente moveshonnan: nan por kambia e hungadó, nan por lag’e den libertat of nan por pone riba ‘waivers’.
Roger tabata tin un promedio di .143, konektando kuater hit den 28 turno i solamente un hit den 11 turno komo pinch-hitter. Segun Roger, e la keda un tiki sorprendé pero por komprendé e situashon. Lo e warda algun dia i wak kiko lo pasa.