WILLEMSTAD – Futbòl Liga MCB a kontinuá den wikènt tras di lomba ku sinku partido. Den e promé partido djabièrnè anochi, e ekipo di Undeba a derota Vesta ku skor di 3-0. Pa Undeba dos di e golnan a keda anotá pa Norvaniel Naar, miéntras ku e otro gol a keda anotá pa Jimbertson Vapor.
Djasabra tabata tin dos partido, kuminsando ku Centro Dominguito kontra Centro Barber. Den e partido aki ta Centro Dominguito a sa di sali viktorioso, derotando Barber ku skor di 4-1. Pa Dominguito e golnan a keda anotá pa, Kemoy Reid, Mirco Colina Jr. na dos okashon i Shaquelle Clements. E úniko gol di Centro Barber a keda anotá pa Jurensley Martina.
Den e di dos partido di djasabra e ekipo di SUBT a topa ku Jong Holland. Akinan tabata Jong Holland ku a sa di sali di e porta grandi ku skor di 1-0. E gol a keda anotá pa Nathan Martina pa medio di pinalti.
Djadumingu, Sithoc a bai ku e viktoria, ganando e ekipo di Jong Colombia ku skor di 4-0. Pa Sithoc e golnan a keda anotá pa, Andy Torres, Shurwendel Roosje na dos okashon i Jursley Kroonstadt.
Den e ultimo partido pa e wikènt tras di lomba, Hubentut Fortuna a enfrentá Victory Boys. Akinan ku gol di Osacar Molina e ekipo di Hubentut Fortuna a sali viktorioso ku skor di 1-0.
E siman aki futbòl ta siguí ku partidonan riba djárason i djasabra. Djárason, 7 di mei, Centro Dominguito ta enfrentá Hubentut Fortuna. Despues rib djasabra 10 di mei tin dos partido. Den e promé partido Jong Holland ta hunga kontra Undeba i despues den e di dos partido Jong Colombia ta enfrentá Vesta.