Bòkseo: Floyd Mayweather kontra Marcos Maidana

LAS VEGAS, NEVADA – Mañan djasabra lo tin e mega kartelera di bòkseo na momentu ku Floyd “Money” Mayweather enfrentá Marcos “El Chino” Maidana na MGM Grand na Las Vegas. Maidana ku tin un rèkert di 35 gana for di kua 31 knockout i 3 pelea pèrdí ta bai purba na duna Floyd Mayweather su promé derota di su karera profeshonal. Mayweather tin un rèkert di 45 gana for di kua 26 knockout i 0 pèrdí.

E pelea lo ta un pelea programa pa 12 asalto, kaminda tantu e faha di WBC peso welter di Mayweather komo esun di WBA peso welter di Maidana lo ta den wega. Pa Floyd Mayweather tin un bolsa garantisá di por lo mínimo $32 mion dòler. Miéntras ku pa Maidana e bolsa ta na un mínimo di $1,5 mion dòler garantisá.

Komo pelea ko-estelar riba e kartelera tin e pelea entre Amir Khan i Luis Collazo. Esaki tambe lo ta un pelea programá pa 12 asalto pa e título di ‘WBC Silver Welterweight’.

Tambe riba e kartelera tin Adrien Broner ku lo ta bek den ring despues di su derota kontra Marcos Maidana. Broner lo enfrentá Carlos Molina pa e título di “WBA International super lightweight”.