Resultado Futbòl Liga MCB #4

WILLEMSTAD – Futbòl Liga MCB a kontinuá den wikènt tras di lomba ku sinku partido. Djabièrnè anochi 4 di aprel tabata tin e promé partido ora ku SUBT a topa ku Jong Colombia. Den e partido aki tabata SUBT ku a sa di bai ku e tres puntonan, ganando di Jong Colombia ku skor di 3-0. Pa SUBT a golnan a keda anotá pa Geryon Alberto na dos okashon i Irving Doran.

Djasabra 5 di aprel tabata tin dos partido. Den e promé partido entre Jong Holland i Centro Barber tabata Jong Holland ku a sa di sali di e porta grandi, derotando Barber ku skor di 3-2. Pa Jong Holland e golnan a keda anotá pa Fernando Zimmerman, Quinton Christina i Charles Martina. Pa Centro Barber ambos gol a keda anotá pa Jurensley Martina.

Despues di e partido aki e siguí e partido entre Vesta i Hubentut Fortuna. E partido aki a finalisá na un empate na un gol. Pa Hubentut Fortuna tabata Lisandro Trinidat ku a habri e markadó, miéntras ku Ruchendro Kierindongo a igualá e markadó pa Vesta.

Riba djadumingu Liga MCB a kontinuá ku dos partido. Den e promé partido Centro Dominguito a topa ku Sithoc. Akinan ku dos gol di Mirco Colina Jr i otro di Ashar Bernardus, Centro Dominguito ta gana ku skor di 3-1. Pa Sithoc tabata Oswin Luiciano ku a anotá.

Den e di dos partido di djadumingu, Victory Boys a topa ku UNDEBA. Den e partido aki UNDEBA a sa di anotá na tres okashon pa gana di Victory Boys ku skor di 3-1, ku golnan di Deannejive Willems, Christopher Lourens i Jimbertson Vapor. E úniko gol di Victory Boys a keda anotá pa Raylison Lindo.