WASHINGTON DC – Den wikènt ku ta tras di lomba Deporte Awe tabata tin e oportunidat di presensia e partidónan di beisbòl Liga Grandi entre Atlanta Braves i Washington Nationals. Mes ora nos a probechá di e okashon i a kòmbersá ku e pelotero yu di Kòrsou, Andrelton Simmons.
Den e entrevista di mas of ménos 11 minüt, Simmons ta konta entre otro di su premionan ku e la risibí temporada pasa, preparashon an ku e la hasi pa e temporada aktual, tambe e la papia di su kontrakt ku e ekipo Atlanta Braves i por ultimo Simmons a papia un tiki riba futbòl.
Banda di kòmbersá ku Andrelton, nos a para na banda i opservá e pelotero aki promé ku e partido kuminsá. Mester bisa ku Andrelton ta sumamente dediká na loke e ta hasi. Andrelton ta e promé ku ta sali bai stretch i kalentá. Na yegada den ‘clubhouse’ bo no ta haña Andrelton niun kaminda. Bo ta puntra su koleganan di ekipo unda e ta i nan ta bisabu ku un smail riba nan kara: “e la bai pafó bai stretch kaba.”
Para den dugout huntu ku e manager di e ekipo, bo ta mira Andrelton ta kore bin for di riba vèlt den direkshon di dugout. Mes ora bo ta pensa ku ta algu e pelotero a lubidá, lugá Andrelton a bin yama e manager di e ekipo pa e bin riba vèlt pa nan kuminsá ku praktiká di bateo.
Bo por a nota ku Andrelton ta ansioso pa sigui siña i tambe traha riba e lokualnan ku e sa kaba i no ta importá ku ta e manager di e ekipo ta tarda kos, Andrelton ta bin yam’e. Ku e kondukta aki nos ta kere sigur ku Andrelton lo tin un karera eksitoso den beisbòl profeshonal i ku te asta den algun ana nos lo yam’e “The Captain”.