MERKA – Pa promé biaha den historia Kòrsou tin sinku pelotero riba roster di Liga Grandi pa e inougurashon di temporada. Esaki ta loke Major League Baseball a duna di konosé den un komunikado. Tantu na aña 2009 komo aña 2012 Kòrsou tabata tin kuater hungadó riba roster. Major League Baseball a konsiderá tur hungadó ku ta riba e roster di 25 hungadó inkluyendo peloteronan ku ta riba lista di hungadó leshoná.
Segun e komunikado, 26,1 porshento di e peloteronan riba roster pa e inougurashon di temporada 2014 ta peloteronan ku no a nase na Merka. Ta trata aki di un kantidat di 223 pelotero for di un total di 853.
Un biaha mas Repúblika Dominikana ta e pais ku mas tantu hungadó estranhero den Liga Grandi ku 82 pelotero, sigui pa Venezuela ku tin 59 pelotero. Cuba ta na di tres lugá ku 19 pelotero. Puerto Rico tin 11; Canada 10; Hapon 9; Mexico 9; Kòrsou 5; Colombia 4; Panama 4; Nicaragua 3; Australia 2; Sur Korea 2; Taiwan 2; Aruba 1 i Brazil 1.
E sinku peloteronan Kurasoleño riba roster ta:
1. Andrelton Simmons (Atlanta Braves)
2. Kenley Jansen (Los Angeles Dodgers)
3. Roger Bernadina (Cincinnati Reds)
4. Jonathan Schoop (Baltimore Orioles)
5. Jurickson Profar (Texas Rangers, riba lista di hungado leshona)