WILLEMSTAD – E ekipo di Centro Dominguito a anunsiá awe ku nan lo no klasifiká pa e siguiente buèlta di e CFU Club Championship Cup. Esaki tabata konosí for di siman pasa ora ku e ekipo di Centro Domiguito a finalisá e promé buèlta di e torneo na di dos lugá den su grupo. Pero pa motibu ku e ekipo di Valencia FC di Haiti no por a demostrá nan afiliashon na e Federashon di Futbòl Haitiano, tabata tin un posibilidat ku Centro Domiguito por a remplasá e ekipo aki den e torneo i asina tog pasa pa e di dos buèlta.
Sin embargo, e Union di Futbòl Karibense konosí komo CFU a tuma e desishon pa kompletamente eliminá e di dos buèlta di e kampionato. Ku esaki e tres ekiponan ku a gana nan grupo den e promé buèlta lo representá CFU den e 2014/2015 CONCAFAF Champions League.
Apesar di ku e ekiponan, Waterhouse FC (Jamaica), Bayamon FC (Puerto Rico) i Alpha United (Guyana) a avansá pa e CONCACAF Champions League, nan mester sigui kumpli ku e regulashonnan stipulá pa CONCACAF. Si esaki no ta e kaso, Centro Dominguito lo remplasá e ekipo aki komo e mihó di dos lugá di e kampionato.