MERKA – Ku komienso di e temporada regular di beisbòl Liga Grandi e siman aki, e diferente ekiponan mester a hasi nan ultimo kortenan den nan roster di Spring Training. Esaki a trese kuné ku tantu Roger Bernadina komo Jonathan Schoop lo kuminsá temporada den Liga Grandi.
For di djabièrnè tabata tin informashonnan ku Jonathan lo keda ku e ekipo di Baltimore Orioles despues di Spring Training, pero niun di e kabesantenan di e ekipo no a kier a konfirmá esaki. Tabata djasabra atardi ku manager di e ekipo, Buck Showalter a duna di konosé ku Jonathan lo keda ariba ku e ekipo di Orioles.
Pa Roger tambe, tabata djasabra atardi ku e manager di Cincinnati Reds, Bryan Price a dune e notisia ku e ta keda ariba ku e ekipo. E echo aki ta aktivá mesora e akuerdo ku Roger tin ku e ekipo. Esta ku si e logra keda ku e ekipo den Liga Grandi despues di Spring Training e lo gana $1 mion dòler pa e temporada aktual.
Lástima mente, ku e notisia no tabata mesun bon pa Didi Gregorius. E ekipo di Arizona Diamondbacks a tuma e desishon pa manda e pelotero Tripel A den e ekipo di Reno Aces. E ekipo di Arizona Diamondbacks tin un gran nesesidat di picheo, lo ke a pone ku e ekipo a disidí di habri temporada ku 13 picher en bes di 12. Pa traha lugá pa e picher adishonal aki nan mester a eliminá un hungadó di posishon for di riba nan roster. Segun e gerente general Kevin Towers, e ta kere ku den futuro e ekipo lo bai tin mester di Didi bek den Liga Grandi.