WILLEMSTAD – E di tres siman di futbòl Liga MCB a continua den wikènt tras di lomba. E partido di djabièrnè entre Centro Dominguito i Jong Colombia a keda postpone i lo wòrdu hunga awe 8’or di anochi na stadion Ergilio Hato.
Djasabra 29 di mart tabata tin e partido entre SUBT i Sithoc. Den e partido aki SUBT a sali di e porta grandi, goliando e ekipo di Sithoc ku un skor di 5-1. Pa SUBT Geryon Alberto a anotá na tres okashon, miéntras ku Stallone Isenia a anotá na dos okashon. E úniko gol di Sithoc a keda anotá pa Jason Inecia.
Despues di e partido aki e siguí e partido entre UNDEBA i Hubentut Fortuna. Den e partido aki UNDEBA a sali viktorioso ganando di Hubentut Fortuna ku skor di 3-1. Christopher Lourens, Norvianel Naar i Edelmar la Cruz a anotá pa UNDEBA. Miéntras ku Johuar Martina a anotá pa Hubentut Fortuna.
Riba djadumingu Liga MCB a kontinuá ku dos partido. Den e prome partido Jong Holland a topa ku Victory Boys. Akinan ku golnan di Randal Winklaar, Jonathan Lindo i Vylison Lake e ekipo di Victory Boys ta derota Jong Holland ku skor di 3-1. Pa Jong Holland e gol a keda anotá pa Charles Martina.
Den e di dos partido di djadumingu, Vesta a topa ku Centro Barber. Despues ku Centro Barber a kai atras 1-0 riba un gol di Ruchendro Kierindongo di Vesta e ekipo a sa di bini bek i gana e partido ku skor di 2-1. Jurensley Martina tabata e hungadó ku a sali na reskate di Barber, anotando tur dos gol pa e ekipo.