SURPRISE, ARIZONA – E ekipo di Texas Rangers a anunsiá ku e segunda base, Jurickson Profar lo pèrdè 10 pa 12 siman di temporada pa motibu di leshon na su skouder drechi.
Segun informashonnan, Porfar a sinti doló na su skouder den di seis entrada di e partido kontra San Diego Padres riba djasabra, na momento ku e pelotero a bai purba konvertí un dòbel play. Jurickson a presentá djadumingu na e kampamentu di Texas i ketu bai tabata sinti su skouder ‘stijf’. Esaki a pone ku e ekipo a manda e pelotero bai hasi un MRI, ku a konkluí ku e pelotero tin un sker na su múskulo di skouder.
Tur kos ta mustra ku Profar no mester opera i e ekipo ta spera ku e pelotero lo por ta bek promé ku All Star Game.
Tabata un Spring Training desepshonante pa Jurickson ku a pèrdè algun dia na inisio di Spring Training ku leshon na skouder. Una bes Profar a haña lus bèrdè di e leshon aki, e leshon a sigui molesti’e i e ekipo a bolbe dune algun dia di sosiegu. Ora tur kos a mehorá ku e skouder, Jurickson mester a pèrdè algun dia atrobe pa motibu di rankamentu di djente. E leshon aktual di Jurickson no ta e mesun leshon ku e tabata tin na inisio di Spring Training.
Te ainda e ekipo di Texas Rangers no tin sigur ken nan lo laga remplasá Jurickson den e promé mitar di temporada.