BAYAMON, PUERTO RICO – E ekipo di Centro Dominguito ta empatá ku e ekipo di Unite Saint Rosienne di Guadeloupe na sero gol den e promé partido di CFU Club Championship Cup.
Segun informashonnan for di Puerto Rico, e ekipo di Centro Dominguito a kuminsá e partido bon i no a laga su mes keda intimidá pa e ekipo di Unite Saint Rosienne. Sin embargo, e manera ku e ekipo Franses tabata toka e bala i desaroyá nan atake riba e ala drechi e pone ku Dominguito a hañ’e obligá na entrega medio kampo. E ekipo Franses tabata ataká konstantemente riba e ala drechi, probechando di fayonan defensivo di e ekipo Kurasoleño. Apesar di esaki e ekipo di Kòrsou a sa di wanta i no permití gol.
Ku e empate aki ambos ekipo ta disponé di un punto den e kampionato. Bayamon FC ta kabesa e tabla di posishon ku tres punto despues ku nan a gana ku skor di 5-0 di Bodden Town FC.
E ekipo di Dominguito lo mira akshon atrobe djadumingu 23 di mart, mitar di shete di anochi, ora ku nan enfrentá e ekipo di di kas ku ta Bayamon FC. Despues Centro Dominguito ta hunga atrobe dia 25 di mart kontra Bodden Town FC di Cayman Islands.