SARASOTA, FLORIDA – Jonathan Schoop sin duda ta hasiendo un bon prestashon den e kampamentu di entrenamentu di Baltimore Orioles. Jonathan ta batiendo pa un promedio di .400, ku un honron i seis kareda empuha. “E ta hasiendo un gran trabou na bate, e ta un di nos lidernan ofensivo aktualmente,” e gerente general di e ekipo, Dan Duquette a bisa den un kòmbersashon ku Deporte Awe.
Segun Duquette, “e pelotero ta ketu bai den kontienda pa logra un lugá den e ekipo di Liga Grandi. Pero na su edat ta importante pa e pelotero hunga beisbòl tur dia, e tin solamente 22 aña di edat i ketu bai e ta desaroyando su abilidatnan. Esaki ta un punto ku nos lo evaluá na momento ku tin ku tuma un desishon si e pelotero ta keda den Liga Grandi of bai bek Liga Menor.”
Duquette a sigi bisa ku, “turnonan adishonal na bate i eksperensia den Liga Menor lo ta útil pa e pelotero, pero ken sa, Johnathan por ta kla pa hunga den Liga Grandi kaba. Jonathan a bin prepará pa e oportunidat aki.”
Kual sea e desishon, Duquette ta pensa ku Schoop ta un tremendo pelotero i ta kere ku Jonathan lo ta un bon hungadó pa Baltimore pa un temporada largu.
Por ultimo, e gerente general a duna di konosé ku e organisashon di Baltimore Orioles ta sumamente satisfecho ku e trabou ku peloteronan di Kòrsou a bin ta hasi i ta sumamente kontentu di e trabou ku nan scout na Kòrsou, Ernst Meyer ta hasiendo.