E pelotero Kurasoleño Jonathan Schoop ta hasiendo un bon trabou na Spring Training. Te na momento nan aki a Jonathan ta batiendo pa un promedio di .400, ku un honron i seis kareda empuha. Schoop ta den kompetensia ku Ryan Flaherty, Jemile Weeks i Alex Casilla pa e puesto regular di segunda base den Baltimore Orioles. E bon prestashon ku Jonathan tin te ainda den Spring Training a hinka e ekipo di Baltimore Orioles den un posishon difísil.
For di aña pasa e gerente general di Baltimore Orioles, Dan Duquette a bin ta bisa ku, e ta preferá pa Jonathan Schoop kuminsá e temporada den Tripel A. Na opinion di Duquette, Jonathan por probechá di un tiki mas eksperensia promé ku e wòrdu yama komo hungadó di tur dia den Liga Grandi.
Miéntras ku algun siman pasa e manager di e ekipo, Buck Showalter a bisa na inisio di Spring Training ku e kaminda ku Jonathan Schoop ta bai kuminsá temporada no ta skirbi pretu riba blanku.
E siman aki tantu fanátikonan i konosedónan di beisbòl a bin ta bisa ku Jonathan Schoop mester ta e kandidato preferí pa habri temporada na segunda base pa Baltimore Orioles. Segun un scout ku ta siguiendo Baltimore Orioles na Spring Training, Jonathan Schoop ta klaramente e kandidato prinsipal pa Orioles na segunda base.
Dikon e situashon aki ta unu difísil pa e ekipo di Orioles? Manera ta konosí tur e ekiponan di deporte profeshonal ta un negoshi i bo no por neglishá e aspekto aki. Pa e motibu aki gerensia Baltimore Orioles lo tin un desishon hopi difísil pa tuma den e próksimo siman nan pa ku Jonathan Schoop.
Jonathan Schoop aktualmente tin 27 dia di servisio akumulá den Liga Grandi. E pelotero ta haña un aña di servisio pa kada 172 dia di servisio akumulá. Esaki ta nifiká ku si e ekipo di Orioles mantené e pelotero riba su roster di 25 hungadó despues di Spring Training e pelotero lo keda den kontrol di e ekipo pa e próksimo seis temporadanan. E ultimo aki saliendo for di e punto di bista ku e pelotero no ta wòrdu degradá pa Liga Menor den e seis añanan aki. Den e kaso aki Schoop ta haña e oportunidat pa bira agente liber despues di e temporada di aña 2019 i ta haña e derechi pa arbitrahe salarial despues di e temporada 2016.
Akinan e kos ta primi pa Baltimore Orioles, si e ekipo laga Jonathan Schoop habri temporada den Liga Menor i mantené e pelotero den Liga Menor te ku por lo ménos 8 di mei próksimo, e ekipo lo haña un aña adishonal di kontrol riba e pelotero. Ku esaki Jonathan lo bira agente liber despues di e temporada 2020 en bes di e temporada 2019. Meskos ta konta pa e aña an di arbitrahe salarial. Den e kaso aki Schoop lo haña derechi pa arbitrahe salarial despues di e temporada 2017 en bes di e temporada 2016.
Klaramente no un desishon fásil pa e maneho di Baltimore Orioles tuma den e próksimo siman nan. Ta di wak si Orioles lo honra e bon prestashon di Jonathan of si nan ta wak e aspekto komersial di e profeshon i laga Schoop habri den Liga Menor i di e manera aki saka un aña adishonal di kontrol riba e pelotero.
Jonathan mes no tin problema unda e kuminsá e temporada 2014. Segun e pelotero su meta prinsipal ta pa yega Liga Grandi i esei por ta den aprel of despues. “Loke sea ku pasa, ami ke hunga beisbòl,” Schoop a bisa. “Si mi kuminsá den Tripel A, mi ta traha duru pa yega Liga Grandi i si mi kuminsá den Liga Grandi mi ta hasi mi best pa mi keda ei nan.”