MIAMI, FLORIDA – Hues Spencer Multack a stipulá un fecha tentativo kaminda e lo trata e kaso di violensia doméstiko kontra pelotero, Wladimir ‘Coco’ Balentien. 9 di april 2014 ta e fecha ku e hues a stipulá tentativamente pa trata e kaso. E fecha aki a keda stipulá den un oudishon kaminda ofisialmente a presentá e kargonan kontra Wladimir.
Den e siman promé ku 9 di aprel lo tin otro oudishon kaminda un biaha mas hues lo sinta ku abogadonan i fiskal pa determiná si e dos partido nan ta kla pa komienso di e kaso. Ta di spera ku aki nan abogadonan di Wladimir lo trata na postpone e kaso ya komo ku e temporada di beisbòl profeshonal Hapones a kuminsá i e pelotero mester ta presente pa tratamentu di e kaso.
Si e hues no bai di akuerdo ku e petishon pa postpone e kaso te na final di e temporada di beisbol e ora ei un posibel solushon lo ta pa trata e kaso den mei próksimo. Ta konosí kaba ku Wladimir lo ta na Merka entre 6 pa 11 di mei próksimo pa tratamentu di su kaso di divorsio.
Den e oudishon ku a tuma lugá, un biaha mas via di su abogadonan, Wladimir a deklará su mes no kulpabel di e kargonan presentá kontra dje. E dos kargonan ku a keda presentá kontra Wladimir ta di entrada sin permit na e kas di Karla Balentien i tambe agreshon kontra Karla Balentien.