GOODYEAR, ARIZONA – Aunke ta un tiki tempran ainda, e manager di Cincinnati Reds Bryan Price, ta impreshoná ku Roger Bernadina. E manager di e ekipo ta analisando Bernadina ku aktualmente ta huntu ku Cincinnati Reds den Spring Training.
Segun e manager, e no sa di kon aña pasa no a bai bon ku Roger. Kisas tabata paso e pelotero a hunga muchu tiki aña pasa. Tambe por tabata ta un leshon, aunke ku segun e manager e no ta na altura di ningun leshon. Loke ta sigur pa e manager ta ku Roger ta un di e hungadó nan mas impreshonante den kampamentu di entrenamentu di Cincinnati.
E manager ta sigui bisa, ku e no ta komprendé di kon e ekipo di Washington Nationals no a laga Bernadina hunga mas tantu. Semper e organisashon di Cincinnati tabata impreshoná ku Roger paso e tin un bon disiplina di strike zone i e ta un out difísil. E ta pone e bala den wega. E por kore base i e ta hopi bon defensiva mente, e manager a terminá bisando.
Roger no a hunga den e partido di ayera kontra Los Angeles Dodgers. E pelotero aktualmente a konektá 5 hit den 10 turno na bate for di kua un doblete i un tripel. Tambe e pelotero a anotá 6 kareda i empuha unu.