LAKE BUENA VISTA, FLORIDA – E ekipo di Atlanta Braves a anunsiá ku nan a yega na un akuerdo pa ekstenshon di kontrakt ku shortstop, Andrelton Simmons. E ekipo di Atlanta Braves a mara Andrelton pa e próksimo shete añanan na un balor di $58 mion.
Den un deklarashon Frank Wren, gerente general di e ekipo a bisa ku, “e ekipo ta kere ku Andrelton ta un di e top shortstopnan den e wega i nan ta kontentu di a firm’e, evitando asina e añanan di arbitrahe salarial i e promé dos añanan di agente liber. Ku esaki e ekipo ta keda riba e ruta di mantené e núkleo di hungadónan huntu i e ekipo ta pensa ku Simmons ta parti integral di esaki.”
E montante di $58 mion ku Simmons ta bai gana den e próksimo shete añanan ta repartí den $1 mion komo bonus pa firma, $1 mion pa e temporada 2014, $3 mion pa e temporada 2015, $6 mion pa e temporada 2016, $8 mion pa e temporada 2017, $11 mion pa e temporada 2018, $13 mion pa e temporada 2019 i $15 mion pa e temporada 2020.
“Mi ta hopi emoshoná, mi ta hopi kontentu di por a firma ku un ekipo ku mi a lanta ta wak,” Simmons a bisa. “Mi no ta bai kambia mi manera di hunga, mi ta bai sigui traha duru i mi ta kontentu ku nan tin e konfiansa pa invertí den mi,” Simmons a terminá bisando.
Den e temporada tras di lomba Simmons a batí pa un promedio di .248 ku 17 honron i 59 kareda empuha. Defensiva mente Simmons tabata aun mas mihó kometiendo solamente 14 eror den 753 oportunidat. Esaki tabata motibu ku Andrelton a gana su promé wante di oro i tambe e ‘platinum glove’ den su promé temporada kompletu den Liga Grandi.
Tambe Simmons a bira e di tres persona den e ultimo 30 añanan ku ta gana e premio di Solo Briante otorgá pa Radio Hoyer. E premio aki, ta keda otorgá na persona nan ku a sobresali na un forma hopi spesial i eksepshonal. E otro ganadónan di e premio aki tabata Churandy Martina na 2008 i Rignald Recordino na 2011.