TOKIO, HAPON – Den un konferensiá di prensa e doño i alabes presidente di ekipo di beisbòl Tokyo Yakult Swallows, Tsuyoshi Kinugasa, a komentá riba e kaso di Wladimir ‘Coco’ Balentien.
Segun Kinugasa, e ekipo tabata den kontakto ku agente di e pelotero i a risibí e siguiente informashon. “Balentien a bai bishitá su kasa i nan tabata papia pafó ora ku Wladimir a sugerí pa nan bai kòmbersá paden paso tin hende ku por ta wak. Aparentemente Wladimir a bisa su abogado ku e la forsa su kasa bai paden despues ku e la nengá di bai paden, kisas paso e kasa kier a keda pafó i esaki tabata komienso di e problema,” Kinugasa a splika.
E vershon aki ta kontradesí loke a keda presentá den e reporte di polis di Miami Dade.
Pa loke ta trata e kontrato di Balentien, Kinugasa a bisa, “nos lo pensa riba esaki una bes nos haña un chèns di reuní personalmente ku Balentien pa konfirmá e echo nan.”
Mas aleu e ofisial di ekipo, Masayuki Okumura, tambe ta deseá pa papia ku Wladimir mas pronto ku ta posibel. “Mi ta biaha awe pa Miami. Si ta posibel mi tin gana di topa Balentien pa por konfirmá e echo nan mas lihé ku ta posibel. Mi ta karga e speransa ku Wladimir por ta na kampamentu di ‘Spring Training’ na tempu. Mi no a tende nada di e fiansa, pero ma komprondé ku tin kòmbersashon nan den e direkshon ei. Sperá e kos aki por wòrdu resolve sin tin ku bai dilanti hues,” Okumura a terminá bisando.