MIAMI, FLORIDA – E aktual rei di honron den Beisbòl Profeshonal Hapones, Wladimir Balentien a keda detené riba sospecho di violensia doméstiko. Segun informe di polis, Karla Balentien no tabata kier a habri porta di kas, ni kontesta su telefòn na momentu ku Wladimir a yega kas djadumingu 12 di yanüari. Konsekuentemente Balentien a drenta e kas via di bentana di komedor.
Den e kas Wladimir a gara su kasa di seis aña na su brasa na momentu ku e kier a kore subi trapi. Despues e pelotero a siguí su kasa den kamber i a lòk e porta. Un testigu a tuma nota di loke tabata pasando i a yama polis ku na su turno a detené e pelotero.
Dos kargo a keda presentá kontra di Balentien. E promé tabata un kargo di agreshon kontra su kasa. E di dos kargo ku a keda presentá kontra Wladimir ta di deprivashon di libertat di su kasa.
Wladimir tabata tin un temporada históriko den 2013 kaminda e la konektá 60 honron den e temporada di beisbòl profeshonal Hapones. Kibrando asina aki e rèkert di Sadaharu Oh ku na aña 1964 a konektá 55 honron. Tambe Coco a keda nombra komo e hungadó mas balioso di e temporada 2013 den Liga Sentral di Beisbòl Profeshonal Hapones.