MIAMI, FLORIDA – Djadumingu 12 di yanüari, e aktual rei di honron den Beisbòl Profeshonal Hapones, Wladimir Balentien a keda detené riba sospecho di violensia doméstiko.
Segun e affidavit di polis di Miami Dade, “Wladimir a yega na kas di su kasa. E kasa, Karla Balentien a nengá di kontesta e porta dilanti.”
“Karla Balentien tabata dunando un entrevista na e momentu ey,” e affidavit ta bisa. “Sr. Balentien a rabia i a bula e hèki di palu. Sr. Balentien a purba na drenta dor di diferente bentana dor di saka e ‘screen’ nan i bati riba e bentana nan.”
“Sr. Balentien a drenta dor di un bentana di komedor ku no tabata na lòk i a persiguí Karla ariba. Miéntras ku Karla tabata kore bai, Sr. Balentien a gara su brasa robes pa pare. Karla i su yu muhé a drenta kamber i Sr. Balentien tabata nan tras. Sr. Balentien a drenta e kamber, sera e porta i lòk e porta. Sr. Balentien a nengá di laga Karla sali for di e kamber,”e affidavit ta kontinuá bisando.
“Sra. Riebel (testigu) a bati na porta i a bisa Sr. Balentien ku e la yama polis. Sr. Balentien a habri porta i kana bai abou. Wladimir i Karla tabata kasa pa seis aña i separá pa un aña,” e affidavit ta terminá bisando.
Wladimir tabata tin un temporada históriko den 2013 kaminda e la konektá 60 honron den e temporada di beisbòl profeshonal Hapones. Kibrando asina aki e rèkert di Sadaharu Oh ku na aña 1964 a konektá 55 honron. Tambe Coco a keda nombra komo e hungadó mas balioso di e temporada 2013 den Liga Sentral di Beisbòl Profeshonal Hapones.