Randall Simon i Gigantes de Rivas ta pasa pa final

MANAGUA, NICARAGUA – E ekipo den kua e pelotero Kurasoleño, Randall Simon ta militá a logra pasa pa e seri final di e Liga di Beisbòl Profeshonal di Nicaragua. Esaki despues ku Gigantes de Rivas a bari e seri kontra Tigres de Chinandega.

Randall Simon a konektá un hit den tres turno na bate den e partido aki. E hit di Simon tabata un doblete den di ocho ining ku a empuha un kareda hasiendo e partido 3-1 pa Rivas. Finalmente e ekipo di Rivas a bin gana ku skor di 5-1.

E seri final entre Gigantes de Rivas i Indios del Bóer ta kuminsá dia 15 di yanüari próksimo. Lo tin wega dia 15 i 16 di yanüari próksimo, siguí pa 18 i 19 di yanüari i si tin mester di 21, 22 i 23 di yanüari.