Jemyma Betrian ta keda felisitá pa Gobièrnu di Kòrsou

WILLEMSTAD – Sr. Ivar Asjes, na nòmber di Gobièrnu i Pueblo di Kòrsou ta felisitá nos atleta profeshonal Jemyma Betrian ku un éksito mas ku e la logra den Muay Thai Boxing na Fransia. E biaha aki Jemyma a logra di vense e atleta Katia Semail den 2 minüt di e promé buèlta, pa ku e kategoria mas pisa di 56 kg, pa asina kosechá un título Oropeo mas.

Jemyma a kompetí den mas ku 36 partido den rin for di kual e la pèrdè dos biaha so. Ya e la kosechá hopi título mundial na nivel profeshonal, kual nan ta: Full Muay Thai Rules, kual ta un di e kategoria nan di mas haltu di World Boxing Championship i banda di diferente otro título nan ku e la kosechá e ta tambe Kampion Europeo den Bòkseo.

Un pabien ta bai na Jemyma, e organisashon di Muay Thai Boxing, su coach nan, su mayor nan i famia. Promé Minister Asjes ta kontentu ku Kòrsou ta sigui risibí bon notisia di nos atleta nan ku nan ta sigui alsa nòmber di nos Nashon den eksterior.