RIOM, Fransia – Jemyma Betrian ta añadí un otro faha den su kolekshon. E biaha aki ganando e faha di Kampion Europeo Muay Thai ku e keda sanshoná pa e Union Internashonal di MuayThai (IMTU).
E pelea di Betrian a tuma lugá djasabra ultimo na Riom, Fransia den e Gala di Bòkseo Thai organisá pa Brizon Gym. Jemyma di e ekipo Explosion di Hulanda a bringa den e kategoria di 56kg kontra di Katia Semail di Brizon Gym, Fransia.
Betrian tabata demasiado fuerte pa su kontrinkante Franses. Algu promé ku final di e promé asalto e skina di Semail a tira e sèrbètè blanku den ring pa para e pelea.
“Jemyma ta un profeshonal pa seis aña kaba i e la gana diferente pelea. Tabata imposibel pa kontra atake. E ta un mashin di guera,” Semail a bisa despues di e pelea.