WILLEMSTAD – Konseho di Minister a risibí un delegashon formá pa diferente di nos pelotero nan profeshonal di Kòrsou i di Hulanda, kompañá pa un delegashon di e organisashon ‘Curaçao Baseball Week’ relashoná ku e siman di Beisbòl ku a keda organisá na Kòrsou di 18 – 25 di novèmber 2013 na Blue Bay Curacao Golf & Beach Resort.
Algun di nos beisbolista nan lokal ku ta na Kòrsou aktualmente i ku a forma parti di e delegashon aki ku Gabinete Asjes a risibí, ta entre otro: Wladimir “Coco” Balentien, Hensley Meulens, Andrelton Simmons, Didi Gregorius, Jurickson Profar, Shairon Martis, Roderick Bernadina i Jonathan Schoop.
Meta di ‘Curaçao Baseball Week’ ta pa trese nos strea nan di Beisbòl mas serka di nos mucha nan lokal, entre kual un gran kantidat ku ta hunga beisbòl i praktiká otro deporte nan. E hóben nan aki lo haña e oportunidat pa konosé, interkambiá, risibí firma, wak wega nan di sòftbòl, disfrutá di un ‘home run derby’, forma parti di klínika nan i saka potrèt ku nos héroe nan di beisbòl internashonal.
Lo bai tin tambe oportunidat pa nos coach nan lokal por bishitá diferente seminario spesial di beisbòl. Ademas a organisá un sena pa haña e fondo nan nesesario ku lo sirbi pa e desaroyo nan ku mester tuma lugá na e parke di beisbòl na Jandoret.
Na nòmber di Gobièrnu di Kòrsou, Promé Minister Sr. Ivar Asjes a gradisí Blue Bay Curacao Golf & Beach Resort, ku a tuma e inisiativa pa organisá e siman aki di beisbòl. Na mes momento tambe nos Promé Minister a yama un danki spesial na nos beisbòlista nan pa nan disposishon i aporte, ku ta na benefisio di nos hóben nan deportista, ku lo haña e estímulo nesesario pa sigui paso di nan ídolo nan.
Gobièrnu a hasi un apelashon na organisashon di ‘Curaçao Baseball Week’ en kuestion pa den futuro serkano huntu bai organisá mas di e tipo di aktividat nan aki ku inklushon di nos talento nan internashonal. E proposishon ta pa hasi esaki por lo ménos un bia pa aña risibiendo nos strea nan na Plasa Brion, kaminda Pueblo tambe por partisipá.
Hensley Meulens, Wladimir “Coco” Balentien i tambe e organisashon di ‘Curaçao Baseball Week’ a aploudí e intenshon i plan nan di Gobièrnu, ku lo yuda pa nos por tin mas di e strea nan di beisbòl aki un par di aña. Tambe Coco Balentien a ekspresá ku pa por logra esaki, en bes di pone fiesta i músika, ta mas importante pa por tin material i mas fasilidat pa hasi deporte. Komo tal e pelotero nan aki ta aploudí ku Gobièrnu di Kòrsou a reservá 14 mion florin èkstra pa fasilidat nan deportivo pa e tres aña nan benidero.