BALTIMORE, Maryland – Un dia despues ku Baltimore Orioles a keda eliminá for di kontienda pa post temporada, Jonathan Schoop ta hasi su debut den Liga Grandi. Despues ku Manny Machado a leshoná i Baltimore no tabata den bataya mas pa post temporada tabata di spera ku Jonathan Schoop lo haña oportunidat di hunga.
Schoop ku tabata tin mas ku tres siman ku e ekipo di Baltimore no a laga e chèns aki pasa. E number seis a yuda Baltimore yega na un viktoria di 9-5 kontra Toronto Blue Jays. Den su promé turno na bate den Liga Grandi, Jonathan ta konektá un single pa center field ku ta bira tambe su promé hit di su karera. Esaki no tabata basta pa Schoop i den seis ining e la konektá su promé honron di su karera, un bataso largo te den profundidat di center field.
Jonathan ta sera e anochi konektando dos hit den tres turno i un base por bola. Mas aleu Jonathan ta anotá tres kareda i empuha unu.