CHICAGO, Illinois – Andrelton Simmons ta konektá dos honron pa asina garantisá viktoria di Atlanta Braves ku skor di 5-2 riba Chicago Cubs. Un dia despues ku e ekipo di Atlanta Braves a benta un chèns afó pa gana e divishon ost di Liga Nashonal, Simmons a karga e ekipo na viktoria. Ku e viktoria aki mes ora e ekipo di Braves a gana nan divishon i garantisá nan pase pa post temporada.
Simmons a konektá e promé honron den di kuater ining ku niun koredó na base pa su di 16 honron di temporada. Den di ocho ining Andrelton a pone e wega riba ijs konektando su di dos honron di e partido mandando e ekipo di Atlanta Braves ariba ku skor di 5-2.
Notabel ta ku den Andrelton su ultimo 20 hit nan, 15 di nan tabata pa base èkstra. Simmons a konektá den e periodo aki seis honron, shete doblete i dos tripel. Den e di dos parti di temporada ku ta 60 partido, Simmons ta batiendo pa un promedio di .248 ku nuebe honron i 24 kareda empuha.