LOS ANGELES, California – E ekipo di Los Angeles Dodgers ta bira e promé ekipo ku ta gana nan divishon e temporada aki. Dodgers ta logra nan promé pase pa post temporada for di aña 2009 ganando di Arizona Diamondbacks ku skor di 7-6. Esaki ta e di 12 biaha ku Los Angeles Dodgers ta gana e divishon West di Liga Nashonal for di tempu ku divishon nan a keda instalá na aña 1969.
Ku e pase aki di Los Angeles Dodgers, Kòrsou por konta ku un pelotero yu di Kòrsou den post temporada 2013. Kenley Jansen lo hasi su debut den post temporada e aña aki. Jansen tabata tin un bon temporada ku Dodgers. Kuminsando komo “setup men” na inisio di temporada a logra gana konfiansa di e ekipo durante temporada i awor ta e “closer” di e ekipo.
Kenley a mira te ainda 72 aparishon e temporada aki for di kua e la salba 26 partido. Ku esaki Jansen ta logra su di dos temporada konsekutivo di 25 of mas wega salba. Jansen ku 104 ta na di dos lugá den relevista nan ku mas ponche e temporada aki. Dilanti Kenley ta Aroldis Chapman ku un saldo di 106 ponche.