FUKUOKA, Hapon – Wladimir Balentien a konektá su di 20 honron di temporada den e partido entre Tokyo Yakult Swallows i Fukuoka SoftBank Hawks. E honron di Balentien a bin den promé ining ku un koredó na base i a manda Swallows ariba 2-0. Lástima mente, e ekipo di Swallows no por a wanta e bentaha i a pèrdè ku skor di 7-3.
Ku e di 20 honron di Balentien e ta bira e promé hungadó ku ta konektá 4 honron den turno nan konsekutivo na bate for di aña 2003. E ultimo ku a hasi esaki na aña 2003 tabata Atsuya Furuta.
Wladimir a konektá un honron den di nuebe ining den e partido kontra Hokkaido Nippon-Ham Fighters djasabra ultimo. Djadumingu un biaha mas kontra Hokkaido Nippon-Ham Fighters, Wladimir a konektá 2 honron pa Tokyo Yakult Swallows. Balentien a haña dos turno ofisial na bate den e partido aki i a risibí tambe dos base por bola. Por ultimo, e di 4 honron di Balentien den e partido kontra Fukuoka SoftBank Hawks den promé ining.
Balentien tabata tin e chèns den e partido aki pa establesé un rèkert hapones nobo, konektando honron den 5 turno konsekutivo. E no ta logra esaki konektando un single den su di dos turno na bate. Den e partido aki Balentien a konektá 2 hit den kuater turno na bate, ku 2 kareda empuha. Balentien tin un promedio aktual di .305.