WASHINGTON, DC – Tur kos ta mustra ku Roger Bernadina ta hañando su swing bek i a konektá 2 hit den kuater turno pa yuda Washington Nationals gana di Baltimore Orioles ku skor di 9-3. Bernadina ku a konektá solamente un hit den su previo 17 turno nan na bate awor tin 3 hit den su ultimo 8 turno nan.
Roger su promé hit den e partido a bin den di 4 ining na momentu ku e la konektá un honron solitario pa right field pa su promé honron di temporada. Den bòm di 8 ining Bernadina ta konektá un single empuhando Ian Desmond pa su di 2 hit i ala bes su di 2 kareda empuha di partido. Aktualmente Roger ta batiendo pa un promedio di .143 den 70 turno nan bate, for di kua 1 doblete, 1 tripel, 1 honron i 3 kareda empuha.