BALTIMORE, Maryland – For di 12 di mei Jonathan Schoop no a mira akshon mas pa e ekipo di Norfolk Tides. Siman pasa e ekipo a anunsiá ku nan ta pone Schoop riba lista di hungadó leshoná. Schoop a wòrdu pone riba e lista di hungadó leshoná pa shete dia ku dòlò den su parti abou di lomba.
Awor kos ta mustra di ta un tiki mas serio, aparente mente Schoop a keda diagnostiká ku fraktura den su lomba. Esaki ta nifiká ku e pelotero lo tin mester di entre 6 pa 8 siman di sosiegu pa rekuperá. Tur kos ta mustra ku Schoop lo bai tuma un di dos opinion e siman aki pero ta parse ku e diagnosis inisial lo no kambia.
E temporada aki Jonathan tin un promedio di .268 for di kua 6 doblete, 3 honron i 18 kareda empuha den 127 turno na bate ku e ekipo di tripel A Norfolk Tides.