BALTIMORE, Maryland – E ekipo di Baltimore Orioles a anunsiá awe ku nan ta añadí picher Miguel Gonzalez bek riba nan roster i ku esaki mester a manda Jair Jurrjens bek tripel A pa e ekipo di Norfolk Tides. Jurrjens a subi ku e ekipo di Orioles djasabra ultimo na momentu ku nan tabata tin mester di un picher habridó ya komo ku e picher habridó Wei-Yin Chen a keda buta pa 15 dia riba lista di hungadó leshoná.
Jurrjens ku pa promé biaha a enfrentá Tampa Bay Rays a picha e promé dos ining nan hopi bon pero a enfrentá un poko difikultat den di 3 ining. Den e ining aki Jurrjens a permití 3 kareda for di kua 2 kareda a bin riba un honron di Matt Joyce. Jurrjens a permití un kareda mas den di 4 ining i bandoná e partido despues di 5 ining lagando Orioles ariba ku skor di 6-4. Lastimá mente e bullpen di Orioles no por a mantené e bentaha i ta permití 6 kareda den di 9 ining. Ku esaki Jurrjens mester a konformá su mes ku un salida sin desishon.
Den e partido Jair a picha sinku ining kompletu permitiendo 6 hit, 4 kareda, 1 base por bola i 5 ponche. E promé ponche den e partido di Jurrjens tabata su di 500 ponche di su karera.