MIAMI, Florida – Mariekson ‘Didi’ Gregorius su seri kontra Miami Marlins no a kuminsá muchu bon konektando solamente un hit den 6 turno na bate den e promé dos partido nan. Esaki a pone Gregorius su promedio baha yega te .333, pero tur kos a kambia den e ultimo partido di e seri. Den e partido aki Arizona Diamondbacks ta pèrdè ku skor di 2-1 for di Miami Marlins, pero Didi ta konektá 3 hit den 4 turno na bate den e partido aki. Ku esaki Gregorius ta subi su promedio na .354.
Gregorius ku ta hasi bon kontakto ku e bala a logra konektá hit den 17 di su 21 partido nan ku e la hunga. Esaki ta inkluyendo 10 wega konsekutivo ku e la konektá hit entre 18 di April i 8 di Mei. Ku e hazaña ei Didi a tabla un rèkert di ekipo, ku e racha di hit konsekutivo mas largu pa kuminsá un temporada i pa kuminsá karera komo un Diamondback.