BALTIMORE, Maryland – Manera a keda anunsiá for di den siman Jair Jurrjens lo ta e picher habridó pa Baltimore Orioles awe djasabra kontra Tampa Bay Rays. Orioles tabata tin mester di un picher habridó ya komo ku e picher habridó Wei-Yin Chen a keda buta pa 15 dia riba lista di hungadó leshoná.
Jurrjens den su debut pa Baltimore Orioles a bira e di dos hungadó di Kòrsou ku ta hunga pa e ekipo di Baltimore Orioles. E promé tabata Ivanon Coffie ku na aña 2000 tabata infielder pa e ekipo di Orioles.
Jurrjens ku pa promé biaha ta enfrentá Tampa Bay Rays a picha e promé dos ining nan hopi bon pero a enfrentá un poko difikultat den di 3 ining. Den e ining aki Jurrjens a permití 3 kareda for di kua 2 kareda a bin riba un honron di Matt Joyce. Jurrjens a permití un kareda mas den di 4 ining i bandoná e partido despues di 5 ining lagando Orioles ariba ku skor di 6-4. Lastimá mente e bullpen di Orioles no por a mantené e bentaha i ta permití 6 kareda den di 9 ining. Ku esaki Jurrjens mester a konformá su mes ku un salida sin desishon.
Den e partido Jair a picha sinku ining kompletu permitiendo 6 hit, 4 kareda, 1 base por bola i 5 ponche. E promé ponche den e partido di Jurrjens tabata su di 500 ponche di su karera.