BALTIMORE, Maryland – Ainda e ekipo di Baltimore Orioles no a hasi e anunsio ofisial pero tur kos ta mustra ku Jair Jurrjens lo ta e picher habridó pa Orioles djasabra. Orioles mester di un picher habridó pa e partido kontra Tampa Bay Rays. Esaki pa motibu ku e picher habridó Wei-Yin Chen a keda buta pa 15 dia riba lista di hungadó leshoná.
Tantu e wepsait di Baltimore Orioles komo esun di Norfolk Tides ta bisa ku e picher habridó pa e partido di djasabra lo wòrdu anunsiá despues. Vise presidente di e ekipo, Dan Duquette a rekonosé ku e ekipo falta un picher habridó pa djasabra. Duquette a bisa, “Jurrjens a picha bon den tripel A. E ta tirando su picheo nan pa strike i ta hopi sólido. E la strika su entrega pa plato.”