PHOENIX, Arizona – Den a partido entre Arizona Diamonbacks i Colorado Rockies, Mariekson ‘Didi’ Gregorius a risibí un lansamentu di 93 mia pa ora den kabes. Esaki a sosodé den bòm di shete ining ora ku Gregorius a kai atras ku dos strike kontra di picher Josh Outman. Gregorius a logra traha e konteo i yega na dos bola, dos strike. E di sinku picheo di Outman tabata un rekta di 93 mia pa ora ku Gregorius no por a kita for di kaminda i a risibí’e den su hèlmu.
Mesora despues di e lansamentu aki Gregorius a kai abou i a keda sapatiá pa algun ratu. Staf tékniko di Arizona Diamonbacks tabata den frakshon di sekònde banda di Didi. Gregorius a logra lanta riba su propio forsa pero mester a bandoná e partido.
Komo medida di prekoushon Gregorius a bai hasi un CT scan ku a sali normal. Manager di Arizona a bisa ku te ainda e no tin pensa di pone Gregorius riba e lista di hungadó nan ku a risibí leshon cerebral, pero tampoko no ta ekskluí esaki. Sea djadumingu of djaluna e ekipo lo disidí kiko lo pasa ku Gregorius.
Gregorius ku tin un promedio di .407 a bisa, “ma purba di kita for di kaminda, pero no tabata lihé sufisiente. E la hinchá un tiki ayera i mi tabata tin un tiki doló di kabes. E ta morde un tiki pero otro di esei mi ta sinti bon.”