SYRACUSE, New York – Shairon Martis ta bek komo habridó pa e ekipo di Rochester Red Wings ku ta e afiliashon den tripel A pa Minnesota Twins. Martis a habri dos partido e temporada aki pero a keda manda pa bullpen despues ku den niun di e dos partido nan aki e no a picha mas ku kuater ining. For di bullpen Martis a picha kuater ining permitiendo un promedio di 6.75 kareda den dos partido.
Martis den su regreso komo habridó a regresá kompletamente diferente. Den e partido di Rochester Red Wings kontra Syracuse Chiefs, Martis a picha sinku ining kompleto. Esaki ta promé biaha e temporada aki ku Martis ta picha mas di kuater ining.
Shairon den su sinku ining nan di picheo a permití dos kareda, unu den promé ining i otro den di tres ining. Na momento ku Martis a bandoná e partido e la laga esaki ku Rochester Red Wings ariba ku un skor di 5-3. Apesar di esaki Martis a keda akreditá ku un salida sin desishon, ora ku su relevo ta permití Syracuse empatá e partido den bòm di seis ining. Martis a picha un total di 75 bala for di kua 50 tabata strike. Den su sinku entrada nan e la poncha kuater, permití sinku hit i ningun base por bola.
Martis te ku awor tin un total di 15 ining i dos tèrsio picha for di kua e la permití 18 hit, 13 base por bola, nuebe ponche i ocho kareda limpi. Ku esaki Martis tin un promedio di kareda limpi permití di 4.60.