Resultado di Liga MCB pa wikènt di 19 – 21 di aprel
WILLEMSTAD – Manera ta kustumber di tur wikènt, futbòl promé divishon a kontinuá ku su partido nan. Un biaha mas tabata tin sinku partido plania pa wikènt aki kuminsando riba djabièrnè i terminando ku e ultimo partido djadumingu. Tur partido a wòrdu hunga den Stadion Ergilio Hato.
Djabièrnè mitar di nuebe di anochi tabata tin e promé partido ora ku Sithoc a enfrentá e ekipo di Vesta. Vesta a drenta e ku un partido gana i tres punto despues di gana un protesta ku nan a entrega siman pasa. Di otro banda Sithoc a bin buska su di dos viktoria di temporada. E ekipo di Sithoc a logra esaki saliendo di e porta grandi ku skor di 2-1 riba Vesta. Ku e viktoria aki Sithoc ta keda na di kuater lugá riba tabla ku ocho punto. Vesta ku su tres punto nan ta keda na di nuebe lugá riba tabla di posishon.
Djasabra tabata tin dos partido, kuminsando 7’or di anochi ku e partido entre Centro Dominguito i Hubentut Fortuna. Hubentut Fortuna a bin buska un viktoria pa asina kompensá pa e tres punto nan ku nan a pèrdè den e protesta entrega pa e ekipo di Vesta siman pasa. Centro Dominguito a sali viktorioso, blankeando Hubentut Fortuna ku sinku gol. Ku e viktoria aki Centro Dominguito ta pasa pa dominá e tabla di posishon. Dominguito ta empatá na punto ku Jong Holland pero ta haña e promé lugá pa motibu di diferensia di gol.
E di dos partido di djasabra a kuminsá 9’or di anochi entre Undeba i Victory Boys. Victory Boys a drenta e partido ku tres punto i Undeba ku dos punto. Ambos ekipo a bin buska e viktoria pa mehorá nan posishon riba tabla di posishon. Ku un blankeo di dos gol Undeba a bai ku e tres punto pa asina subi bai na di seis lugá riba e tabla di posishon. Victory Boys a keda den bòm di e tabla ku tres punto.
Djadumingu tabata tin e ultimo dos partido nan di e wikènt. E promé partido di djadumingu tabata entre Jong Holland i SUBT pa 5’or di atardi. SUBT tabata tin ocho punto i por a kita Jong Holland for di kabes di tabla di posishon ku un viktoria. Pero ambos ekipo a disidí di hasi bon i empatá na sero gol. Ku e empate aki Jong Holland ta keda empatá ku Centro Dominguito ku 11 punto riba tabla di posishon, pero nan ta pèrdè e liderazgo di e tabla pa motibu di diferensia di gol.
E ultimo partido tabata 7’or di anochi entre Centro Barber i Jong Colombia. Jong Colombia a bin buska nan promé viktoria di temporada. Jong Colombia no ta logra esaki i ambos ekipo ta bai kas ku un punto despues di empatá na dos gol.