WILLEMSTAD – Kampionato di futbòl Liga MCB ta sigui e wikènt aki un biaha mas ku sinku partido. Manera ta kustumber tur e partido nan a keda hunga den Stadion Ergilio Hato. Djabièrnè mitar di nuebe di anochi tabata tin e promé partido na momento ku Centro Dominguito a topa ku Victory Boys. Centro Dominguito a bin ku hamber pa un viktoria den e partido aki i no a laga niun duda despues di goliá Victory Boys ku skor di 5-0. Ku e viktoria aki Centro Dominguito tin ocho punto riba tabla di posishon i ta pasa na di dos lugá pa via di saldo di gol.
Undeba a hunga kontra Centro Barber den e promé partido riba djasabra. Undeba a bai buska nan promé viktoria di temporada 2013 pero no a logra esaki despues di empatá na dos gol ku Centro Barber. Ku e resultado aki Centro Barber ta kue di seis lugá riba tabla di posishon, miéntras ku Undeba ta keda den bòm na di nuebe lugá riba tabla.
Den e di dos partido 9’or di anochi Jong Colombia a topa ku Sithoc. Jong Colombia meskos ku Undeba tambe a bai buska su promé viktoria di temporada. Jong Colombia tampoko no a logra esaki despues di empatá na un gol ku Sithoc. Ku esaki Sithoc tin sinku punto riba tabla di posishon i ta kue di sinku lugá riba Centro Barber pa motibu di saldo di gol. Di otro banda Jong Colombia ta kue e di shete lugá riba tabla, dilanti di Victory Boys ku tambe tin tres punto.
Djadumingu e partido nan di futbòl a kuminsá mas tempran. SUBT a midi forsa ku Hubentut Fortuna den e promé partido 5’or di atardi. Ambos ekipo tabata disponé di shete punto riba tabla di posishon i a bin pa e tres punto nan. Apesar di esaki e ekipo nan a disidí di hasi bon i dividí e puntuashon ku un empatá na cero gol.
E ultimo partido di e wikènt tabata e partido entre Jong Holland i Vesta. Vesta tabata den bòm di e tabla di posishon ku tres wega pèrdí i a bai buska nan promé viktoria kontra Jong Holland. E ekipo di Jong Holland a bisa Vesta ku nan si no ta pèrdè nan promé partido pa asina Vesta gana nan promé i a sali di e porta grandi ku skor di 2-0. Ku esaki Jong Holland ta keda na kabes di e tabla di posishon ku dies punto, miéntras ku Vesta ta keda un siman mas na di dies lugá.