EINDHOVEN, Hulanda – E ekipo di futbòl Hulandes, PSV a anunsiá ku nan a yega na un akuerdo di ekstenshon di kontrakt di Jetro Willems. For di 2011 Willems ta forma parti di e ekipo di PSV i ku e ekstenshon e lo keda sigur te ku aña 2017.
Den Willems su promé temporada ku PSV e la hunga solamente 20 wega, pero den un tempu kòrtiku ya Willems a bira parti di e ekipo básiko. Willems a bisa ku e kosnan a bai hopi lihé. “Ora ma yega for di Sparta Rotterdam mi no a logra nada ainda. Awor aki ma hunga asta den Kopa Europeo.”
Konsiente di su trabou komo defensa, Willems no tin masha problema pa keda sin hinka gol. “Mi ta defensor. Mi trabou primario ta defendé. Hinka gol ta bunita, pero no mas ku defensa.” Ku e ekstenshon tras di lomba Willems tin un meta nobo. “Bira kampion ku PSV, p’esei nos mester gana promé djasabra kontra Ajax,” Willems a bisa.