WILLEMSTAD – Manera ya a keda publiká, Federashon Futbòl Kòrsou a anunsiá ku Maduro & Curiel’s Bank (MCB) ta bira patrosinador ofisial di futbòl lokal na Kòrsou. Ku esaki e kampionato di promé divishon pa 3 aña largu lo wòrdu yamá “Kampionato di MCB promé divishon”.
Den wikènt tras di lomba, despues ku wikènt anterior no tabata tin futbòl pa motibu di dia nan di fiesta i di reflekshon, futbòl a sigui. Wikènt aki un biaha mas tin sinku partido riba programa i tur wega ta wòrdu hunga na Stadion Ergilio Hato.
E promé partido tabata djabièrnè na momentu ku Sithoc a topa ku e ekipo di Centro Barber. E partido aki a kaba na un empate di 0 gol. Ku esaki ámbos ekipo ta haña un punto i awor tur dos ekipo ta disponé di kuater punto riba tabla di posishon.
Djasabra tabata tin dos partido, ku e promé partido entre Vesta i Hubentut Fortuna. Den e partido aki Vesta a bai buska su promé punto nan riba tabla di posishon, pero no a logra esaki despues di kai vensí ku skor di 3-1. Ku esaki Hubentut Fortuna ta avansá bai shete punto riba tabla di posishon, miéntras ku Vesta ta keda ku sero punto.
Den e di dos partido tabata tin e enkuentro entre SUBT i Centro Dominguito. Ámbos ekipo a logra bai kas ku solamente un punto despues di a empate na un gol. SUBT awor tin shete punto riba tabla di posishon. Centro Dominguito ta avansá bai sinku punto riba tabla di posishon.
Djadumingu tambe tabata tin dos partido. Den e promé partido Jong Holland a enfrentá Victory Boys, kaminda Jong Holland ku kuater punto a logra e viktoria ku skor mínimo. Ku e resultado aki Jong Holland tambe tin shete punto awor riba tabla di posishon, miéntras ku Victory Boys ta keda ku nan tres punto
E último enkuentro pa wikènt tras di lomba tabata entre Undeba i Jong Colombia. E partido aki a bira e di tres empate di wikènt, na momentu ku e partido entre Undeba i Jong Colombia ta kaba na un gol pa banda. Ku e empate Undeba ta logra nan promé punto di temporada, miéntras ku Jong Colombia ta avansá bai dos punto riba tabla di posishon.