TAICHUNG, Taiwan – E selekshon Hulandes ku ta preparando pa e Klásiko Mundial di Beisbòl a gana na último partido di preparashon e biaha aki kontra Taichung University All Stars. For di e promé ining e ekipo Hulandes a bai ariba 2-0, ku honron di dos kareda konektá pa Wladimir Balentien.
Balentien ta mirando e bala hopi bon, e honron den e partido aki ta su di tres den último kuater partido nan. Mas aya Balentien a logra konektá tres hit den su kuater turno nan na bate den a partido di awe.
Den di kuater ining Hulanda ta amplia e markadó ku un hit di Kalian Sams, empuhando asina Balentien i Andruw Jones.
Ku e viktoria aki e selekshon Hulandes ta terminá nan wega nan di preparashon. Na tur Hulanda a hunga 10 partido di preparashon den kua nan a gana ocho partido i pèrdè dos. Segun Hensley Meulens, “lo ta un desepshon, si nos no gana e Klásiko Mundial. Meulens a terminá bisando, “histórikamente esaki ta e ekipo Hulandes di mas fuerte ku a yega di partisipá na un torneo grandi asina aki.”
E selekshon oraño lo hunga den pool B i nan promé partido lo ta djasabra 2 di mart, 7:30 di mainta ora lokal di Kòrsou kontra Sur Korea. Nan di dos partido lo ta kontra China Taipéi riba djadumingu 3 di mart, 2:30 di mardugá. Por último Hulanda lo enfrentá Oustralia djamars 5 di mart, 12:30 di mardugá.
Segun informashon ku Deporte Awe ta disponé di dje, ta ku planta nashonal Telecuracao lo pasa tur e partido nan aki bibu i direkto.