Kòrsou ta pèrdè ku skor di 3-0 kontra Mexico

WILLEMSTAD – E selekshon U-20 di Kòrsou ku ta buskando klasifikashon pa mundial di futbòl U-20 a sufri nan promé derota na man di Mexico. E promé mitar di e partido a wòrdu dominá kompletamente pa e mehikano nan i esaki a duna fruta. Na di 22 minüt Jesus Corona ta duna Mexico e bentaha di 1-0 ku un tiru di distansha largu.

Mexico a siguí preshoná e ekipo Kurasoleño i na di 34 minüt Uvaldo Luna ta krusa e bala dor di e área penal di Kòrsou, ku fasilidat Corona ta drenta i anotá su di dos gol.

No muchu despues na di 36 minüt Marco Bueno a amplia e anotashon, hibando Mexico ariba ku skor di 3-0.

E di dos mitar di e partido a bai mas mihó pa e selekshon kurasoleño. E ekipo a kuminsá hunga mas akoplá i no tabata defendé mesun profundo ku tabata e kaso den promé mitar. Esaki a pone ku Mexico no a logra yega na mas gol i e selekshon di Kòrsou a algun oportunidat di gol.

Kòrsou lo hunga atrobe mañan anochi kontra di El Salvador. Den U20 Kòrsou a topa na sinku okashon ku El Salvador, di kua Kòrsou a gana un biaha, empatá dos i pèrdè dos.