Kòrsou ta debutá awe den pre-mundial di futbòl U-20

Ku mira pa Mundial di futbòl U-20 e selekshon di Kòrsou ta debutá awe nochi kontra di Mexico den pre-mundial  di futbòl. E selekshon Kurasoleño ta bai buska su lugá den e kuater mihó ekipo nan di e torneo pa asina klasifiká pa Mundial FIFA U-20 na Turkia.

E trabou awe nochi kontra e selekshon di Mexico no ta unu fásil. E selekshon mehikano ku ta kai bou di guia di Sergio Almaguer ta konta ku hungadó nan ku a Sali kampion mundial den e kategoria U-17.

Na tur e selekshon di Kòrsou U-20 a topa na seis okashon kontra e selekshon di Mexico U-20. Den e seis partido nan aki e selekshon di Kòrsou a logra solamente un viktoria, un empate I kuater derota. Kòrsou no a logra nunka ainda empatá, ni gana kontra di Mexico riba teritorio Mehikano.

E selekshon Kurasoleño ta konsistí di e siguiente hungadó nan: kiper: Zeus de la Paz  i Jhudamier Marchena. Den defensa: Nathan Martina, Rachid Habat, Vidarrell Merencia, Emmanuel Felomina i Ronald Roosberg. E parti di medio kampo ta konsistí di: Michael Fecunda, Ruchendro Kierindongo, Christopher Isenia, Richenel Lourens, Derwin Martina, Michael Madionis Maria i Yael Eisden. Den e linea ofensivo tin: Liandro Martis, Denzel Slager, Randel Winklaar, Irving van Eijma, Rowendy Schoop i Riginio Cicilia.

E partido aki lo keda transmití bibu i direkto 10’or di anochi ora lokal di Kòrsou pa kanal FoxSoccer òf kanal 706 di TDS.