Atlanta Braves a tuma e desishon pa manda Jair Jurrjens pa nan ekipo di Tripel A Gwinnett ku e speransa ku Jurrjens lo bolbe bek den e forma eksitoso ku e tabata aña pasa promé ku All-Star game.
“Tabata un desishon hopi difísil pero opviamente no ta e JJ ku nos a mira den pasado,” Fredi Gonzalez manager di Braves a bisa. “ Ma bis’é promé ku e bai, bo no ta e promé hungadó ku ta bai liga menor, regresá bek despues di un kantidat di wega habri pa drecha loke ta robes i logra un karera largu i eksitoso den liga grandi. Ta keda na dje i nos komo organisashon lo hasi tur loke ta posibel pa hañ’é bek i yuda nos gana wega.”
Jurrjens ta plania pa habri e partido di djasabra na Toledo. “Nos trabou ta pa hinka konfiansa bek den dje,” manager di Gwinnett, Dave Brundage a komentá.
Coach di picheo di Gwinnett, Marty Reed, Brundage, Gonzalez i coach di picheo di Braves, Roger McDowell a formulá un plan i e lo ta ekstensivo.
Gonzalez a bisa: “E lo ta grandi, kasi un kambio total. Jurrjens mester hasi tur loke nos pidié pa e pro regresá bek. Konfiansa, forsa den brasa, forsa den pia, entrenamentu físiko, traha riba kondishon, tur kos. E mester hasi lo ke nos pidié.”
Segun Jurrjens no tin èksküs pa su problema nan. “Awor aki, mi no ta e mesun persona ku mi tabata.” Jurrjens a yama esaki un “reality check”. “Si bo ta honesto ku bo mes, mi no tin niun hende pa tira falta riba dje ku no ta mi mes.”
“E ta duru,” Jurrjens a bisa. “Speshalmente ora bo tin un par di aña den liga grandi i tur kos ta mustra fásil anto diripiente bo ta haña kontra tèmpo i ta difísil pa bo saka afó kiko ta pasando.”
E temporada aki Jurrjens a habri 4 partido for di kua e la pèrdè 2 i tabata tin un promedio di kareda pèrmití di 9.37.