Atlanta Braves a tuma e desishon pa manda Jair Jurrjens pa nan ekipo di Tripel A Gwinnett ku e speransa ku Jurrjens lo bolbe bek den e forma eksitoso ku e tabata aña pasa promé ku All-Star game. E mènedjer general di Braves, Frank Wren a bisa: “Nos a baha Jair awe nochi pa e haña un chèns pa traha riba su difikultatnan den Tripel A i ku e speransa ku e lo regresá den bon forma pa yuda nos kompetí. E no tin problema di salú òf leshon, solamente e mester regresá den forma.”
Promé ku risibí e notisia, Jurrjens a bisa: “Mi no ta entrega. Mi ta bai sigui Sali i hasi mi bèst. Ora mi Sali eifó, mi ta purba di hasi mi bèst. Esei ta e úniko kos ku mi por hasi. Awor aki mi no ta e mesun persona ku mi tabata. Lo mi sigui lucha.” E temporada aki Jurrjens a habri 4 partido for di kua e la pèrdè 2 i tabata tin un promedio di kareda pèrmití di 9.37.