Andrelton Simmons a pasa su promé temporada profeshonal lagando hopi ku e impreshon ku e ta e mihó shortstop den liga menor. E hóben shortstop yu di Kòrsou ta lagando hopi boka habri den e kampamentu di Braves den e último siman nan aki.
“E mucha tin tur kos,” segun Chipper Jones, tersera base di Braves. “Ora bo no a hunga ni un dia mas haltu ku klase A i tur hende ku wak bo ta bisa ku bo ta kla pa liga grandi defensivamente, esei ta bisa algu di bo.”
Simmons sigur a hasi un gran impreshon riba hopi kompañero di ekipo, skout nan i miembro nan di prensa ku a mir’é pa promé biaha na spring training. E impreshon aki a trese kuné, ku hopi ta sugeriendo pa Atlanta Braves kambia nan plan di kuminsá e temporada ku Tyler Pastornicky komo shortstop prinsipal i duna Simmons e trabou.
Ora a puntra e coach di bulpen di Braves, Eddie Perez i Chipper Jones pa kompará Simmons ku un otro hungando, mesora tur dos a menshoná Rafael Furcal. Furcal tambe 12 aña pasa a forsa Braves pa promové di klase A pa liga grandi.
Miéntras hopi ta di opinion ku Simmons mester pasa algun tempu mas den liga menor promé ku hasi e pase pa liga grandi, su manager den klase A, Luis Salazar tin otro opinion. Segun Salazar, Simmons ya tin e abilidat pa haña éksito na nivel di liga grandi.
Segun Simmons, “ainda mi tin algun kos di siña. Mi ta purbando di siña mas lihé ku mi por.”