Atlanta Braves a anunsiá ku nan lo tin 21 hungadó ku no ta riba nan roster di 40 komo invitado na Spring Training 2012. Den e invitado nan tin e hóben shortstop yu di Kòrsou, Andrelton Simmons. Simmons ta un di e prospekto nan ku ta primintí hopi na e posishon di shortstop. Na 2010 Simmons a wòrdu di draft pa Atlanta prinsipalmente pa su defensa. Simmons a sorprendé tur hende aña pasa despues di a terminá temporada ku un averahe di .311 ku e ekipo di Lynchburg Hillcats.
Atlanta Braves ta train na ESPN Wide World of Sports Complex na Lake Buena Vista, Florida. Picher i kècher ta reportá na Spring Training riba djadumingu 19 di febrüari, miéntras ku hungadó nan di posishon ta reportá riba djabièrnè, 24 di febrüari. E promé training ku ekipo kompleto ta tuma lugá riba djasabra, 25 di febrüari.