Segun e eskritor di Atlanta Braves pa MLB.com Mark Bowman, Braves a gana un tiki fleksibilidat finansiero despues di a kambia Derek Lowe pa Cleveland Indians e siman aki. Pero awor nan ta eksplorando e posibilidat pa gana mas fleksibilidat dor di papia ku ekipo nan interesá den un kambio pa Jair Jurrjens i/òf Martin Prado.
Bowman ta siguí bisa ku un fuente den Liga Grandi a bisa ku Braves a informá un par di ekipo ku nan ta dispuesto pa kambia Jurrjens i Prado. Tur dos e hungadó nan aki por mira nan respektivo salario subi di alrededor di $3 mion pa $5 mion dor di arbitrahe.
E fondo nan adishonal gana dor di kambia Jurrjens òf Prado por yuda e General Manager di Braves, Frank Wren den su búskeda pa un shortstop i añadí un tiki mas poder den outfield.
Segun Bowman Kansas City Royals ta entre e ekipo nan ku Braves a aserka enkuanto Jurrjens. Braves ta interesá den un kantidat di prospekto di Kansas City, inkluyendo outfielder Wil Myers, ku a pasa último siman nan impreshonando den Arizona Fall League.
Huntu ku Myers, Braves a papia tambe over di Lorenzo Cain. Centerfielder Michael Bourn su kontrakt ta ekspirá na final di e temporada 2012, esaki ta pone ku Braves lo pasa tempu durante winter analisando Cain i otro hungadó nan ku por sirbi komo remplaso pa Bourn.
Parse ku den Atlanta tin prekupashon relashoná ku Jurrjens (rudia drechi) i Prado ya komo nan tur dos no tabata tin un bon temporada. Pero na mes momentu tin duda si Braves por separá nan mes kómodamente for di e dos hungadó nan aki.
Ku insertidumbre rondó di e skouder di Tommy Hanson ta posibel pa Braves saka Jurrjens for di rotashon ku ya kaba ta proyektá di tin dos picher ku ménos di dos temporada kompletu di eksperensia.
Prado di otro banda kisas no ta e remplaso a largo plaso di Chipper Jones na tersera base. Pero si e wòrdu kambia, Braves mester buska un tersera base konfiabel di back-up pa e próksimo temporada.