Na Kòrsou no ta un sekreto ku nos ta apoyá nos atletanan profeshonal na kualke parti di mundu ku nan ta i tambe sin hasi distinshon di e ekipo ku nan ta forma parti di dje. Un ehèmpel ta Andruw Jones, hopi Kurasoleño no ta simpatisá ku e ekipo di New York Yankees pero apesar di esaki nan ta apoyá Andruw Jones te na morto.
Otro pelotero ku tur yu di Kòrsou ta simpatisá ku ne ta Roger Bernadina òf mihó konosí komo “E Tribon”. Apesar di nos yu di Kòrsou nan ku ta simpatisá ku Roger, tin dos otro fanátiko ku ta mas fanátiko di Roger ku kualke yu di Kòrsou. E dos fanátiko nan aki ta Terry i Tyler i tur wega di Nationals ku nan bishita nan ta bai bisti na tribon. Terry i Tyler ta di e parti central di Merka, Terry ta di e estado di Michigan i Tyler ta di Wisconsin.
Terry i Tyler ta yama nan mes i e fanátiko nan di Roger, “Sharkadina”. Segun nan e nòmber ta bin despues di uni Shark i Bernadina. Nan ta bisa ku e manera ku Roger ta bai tras di bala den outfield ta meskos ku un tribon na momentu ku e ta ataka. Segun nan tribon ta e bestia mas feros den e mundu akuatiko i Roger ta e kriatura mas feros riba tereno di wega.
E dos fanátiko nan aki tin un website ku nan ta dediká na Roger, e website ta: www.sharkadina.com. Aki riba bo por haña diferente informashon tokante e prestashon di Roger i su ekipo Washington Nationals. E website ta wòrdu bishita regularmente pa e fanátiko nan di Roger i segun Terry i Tyler, Roger mes sa bishita e website i lesa e kontenido di e website.
Por último Terry i Tyler a terminá bisando ku hamas i nunka Roger no mester a kuminsá e temporada aktual den tripel A. Segun nan Roger ta lihé, e tin mas poder i semper e ta sòru pa un hungada espektakular, loke ta dun’é sufisiente kredibilidat pa ta e center fielder di tur dia pa Nationals.