WILLEMSTAD – Futbòl Liga MCB a kontinuá den wikènt tras di lomba na Stadion Ergilio Hato. For di siman pasa e ekipo di Victory Boys tabata tin un pia den Kaya 6 i e siman aki nan a logra sigurá esaki. Victory Boys a hunga riba djabièrnè kontra Sithoc i a gana esakinan ku skor mínimo di 1-0. E gol a keda anotá pa Braizjon Nocento
Ku e viktoria aki Victory Boys ta den Kaya 6 ku 22 punto e temporada aki. Di otro banda e derota a laga Sithoc ku 13 punto den un posishon delikado riba e tabla di posishon. Den e fin di siman benidero Sithoc lo enfrentá Vesta. Un empate den e partido aki ta sufisiente pa Sithoc garantisá su posishon den Liga MCB otro aña. Miéntras ku si Sithoc pèrdè kontra Vesta e ekipo ta hinka su futuro den man di Jong Colombia i Centro Barber.
Den e promé partido di djasabra e ekipo di Hubentud Fortuna a enfrentá SUBT. Den e partido aki tabata Hubentud Fortuna ku a bai ku e tres puntonan, ganando di SUBT ku skor di 3-1. Ku e resultado aki nada no a kambia pa SUBT ku ya ta den Kaya 6. Pa Hubentud Fortuna si e viktoria tabata importante. Ku e viktoria aki Hubentud Fortuna a kita tur posibilidat di tin ku hunga partidonan di promoshon i degradashon. E golnan pa Hubentud Fortuna a keda anotá pa: Rendel Girigorie, Reylison Otto i Djemie Honorat.
E di dos partido di djasabra a bai entre e ekiponan di UNDEBA i Centro Barber. Akinan tabata Ruensley Leuteria i Christopher Isenia ku a anotá e dos golnan pa sigurá e viktoria di Barber ku skor di 2-0. Ambos ekipo ya ta den Kaya 6 pero ku e viktoria, Centro Barber ta na di dos lugá riba e tabla di posishon awor.
Djadumingu tambe tabata tin dos partido. Den e promé partido e ekipo di Vesta a enfrentá Jong Colombia. Akinan tabata Vesta ku a bai ku e tres puntonan ganando ku skor di 2-1. Pa Vesta e viktoria aki ta laganan ku e speransa di no tin ku hunga partidonan di promoshon i degradashon. E ekipo di Vesta por logra esaki ku un viktoria otro siman. Den kaso di un empate pa Vesta otro siman, e ekipo su destino lo ta den man di Jong Colombia i Centro Barber. Pa Vesta e golnan a keda anotá pa: Ayrickson Maria i Ruchendro Kierindongo. E gol di Jong Colombia a keda anota pa Everon Espacia
Den e di dos partido di djadumingu, Jong Holland a enfrentá Centro Dominguito. E dos ekiponan aki a sòru pa e úniko empate di e wikènt aki ora ku nan partido a finalisá na 0 gol.