WILLEMSTAD — Pa medio di e komunikado aki FFK ta avisá ku dia 31 di yüli 2022, FFK su kolaborashon ku Sr. Art Langeler i Sr. Guus Hiddink ku tabata e direktor tékniko i e entrenadó di nos selekshon nashonal, a terminá.
FFK ta gradisí tantu Sr. Langeler komo Sr. Hiddink pa nan trabou i esfuersonan hasí pa futbol di Kòrsou i ta deseá nan éksito pa futuro.
WILLEMSTAD — Komo preparashon pa nos partisipashon na e CFU Boys’ Under 14 Challenge Series 2022, Kòrsou, Aruba i Boneiru a yega na e idea pa organisá algun partido di fogeo entre e 3 islanan ABC aki na Kòrsou. E partidonan aki a tuma lugá di 7 pa 10 di yüli 2022, na Stadion Rignaal ‘Jean’ Francisca.
E torneo aki sigur tabata unu eksitoso ku nos por siña hopi di dje pa sigui prepará pa nos próksimo kompromisonan pa e CFU Boys’ Under 14 Challenge Series 2022. Tur ekipo a duna un bon bataya i a duna tur ku tin pa mustra kiko nan tin aden.
Resultado di e partidonan;
| Fecha | Skor | Tim di kas | Bishitante | Stadion |
| 7 yüli 2022 | 0-0 | Aruba | Boneiru | RJF |
| 8 yüli 2022 | 1-2 | Boneiru | Kòrsou | |
| 9 yüli 2022 | 0-1 | Boneiru | Aruba | |
| 10 yüli 2022 | 3-4 | Kòrsou | Aruba |
Kòrsou su tim a konsistí di 22 hungadó i un staf tékniko di 7 persona. E hungadónan aki ta parti di nos preselekshon ku ta preparando pa nos kompromisonan na e CFU Boys’ Under 14 Challenge Series 2022 ku lo tuma lugá di 13 pa 21 di ougùstùs próksimo na Repúblika Dominikana.
Danki na tur ku a asistí i presensiá e partidonan aki. Nos ekipo lo siguí prepará pa duna un bon presentashon durante e CFU Boys’ Under 14 Challenge Series 2022!
WILLEMSTAD — Kòrsou, Aruba i Boneiru a wòrdu invitá pa partisipá nan e CFU Boys’ Under 14 Challenge Series 2022. Mirando ku e 3 islanan aki tin e mes un pensamentu di ta bon prepará pa bai e U-14 Challenge Series aki, a surgi e idea pa organisá algun partido di fogeo entre e 3 islanan ABC aki na Kòrsou. E partidonan lo tuma lugá dia 7 pa 10 di yüli 2022, na Stadion Rignaal ‘Jean’ Francisca den oranan di atardi òf mainta.
Aruba su ekipo a yega Kòrsou awe mainta i Boneiru lo yega awe anochi pa sigui ku e preparashonnan pa e partidonan di fogeo aki. Kòrsou su ekipo, ku ta konsistí di hungadónan nasé na aña 2008 i 2009, tambe ta den preparashon den e próksimo dianan p’asina duna un bon presentashon. E partidonan di fogeo aki lo yuda hopi, pa por tin un mihó bista kiko mas mester mehorá i kon prepará nos selekshon ta pa e kompromisonan di e CFU Boys’ Under 14 Challenge Series 2022 ku lo tuma lugá proksimamente.
Skema di nos partidonan;
| Fecha | Orario | Tim di kas | Bishitante | Stadion |
| 7 yüli 2022 | 16:00 | Aruba | Boneiru | RJF |
| 8 yüli 2022 | 16:00 | Boneiru | Kòrsou | |
| 9 yüli 2022 | 16:00 | Boneiru | Aruba | |
| 10 yüli 2022 | 11:00 | Kòrsou | Aruba |
Kòrsou su tim ta konsistí di 22 hungadó i un staf tékniko di 7 persona. E hungadónan aki ta parti di nos preselekshon ku ta preparando pa nos kompromisonan na e CFU Boys’ Under 14 Challenge Series 2022 ku lo tuma lugá di 13 pa 21 di ougùstùs próksimo na Repúblika Dominikana.
Pueblo di Kòrsou kompletu ta keda invitá pa presensiá e partidonan aki. Bin apoyá i sostené nos ekipo ku ta preparando pa e CFU Boys’ Under 14 Challenge Series 2022.
Entrada pa e partidonan aki ta grátis.
WILLEMSTAD — Djabièrnè último, Kampionato Femenino 2021-2022 a yega na su gran final despues di a inisiá na dezèmber aña pasá i a tuma lugá tur djabièrnè anochi na tereno di Willemstad i tambe tereno di Jong Holland. E gran finalnan di kategoria U-17 i kategoria Senior a tuma lugá na tereno di Willemstad promé di yüli último miéntras e ekiponan kampion i supkampion di kategoria U-15 ya tabata konosí. Tur ku ta tei presente a disfrutá di partidonan yená ku emoshon kaminda nos damanan a duna tur ku tin pa bai ku e título máksimo.
Resultado final Kampionato Femenino;
| Tereno | Kategoria | Tim di Kas | vs | Bishitante | U-17 | Senior |
| WILLEMSTAD | U-17 | Jong Holland | vs | Excellence School | 1-3 | – |
| WILLEMSTAD | Senior | VESTA | vs | Hubentud Fortuna | – | 0-1 |
E promé partido a keda empatá na 0 durante e tempu reglamentario i despues den tempu èkstra Excellence School a sa di gana ku skor di 3-1. Tur 3 gol a keda anotá pa Raengelly Keller ku alabes e ta e máksimo goliadó di kategoria U-17, miéntras Laura Lauffer a anotá e úniko di Jong Holland. Asina Excellence School a titulá e kampionnan di kategoria U-17 i Jong Holland a resultá e ekipo supkampion di e kategoria aki.
Despues di e partido final di U-17, e partido di kategoria Senior a tuma lugá kaminda Hubentut Fortuna a gana Vesta ku skor di 1-0 ku gol anotá pa Shadé Desir. Asina e ekipo di Hubentut Fortuna a titulá kampion di kategoria Senior miéntras Vesta a resultá e ekipo supkampion.
Despues di e tremendo partidonan aki Komishon Femenino huntu ku miembronan di direktiva di FFK a hasi entrega di e trofeo i medayanan na e ekiponan kampion i supkampion pa Kampionato Femenino 2021-2022.
Premiashon Femenino;
Kategoria U-15
Kampion: Jong Holland
Supkampion Centro Juve
Kategoria U-17
Kampion: Excellence School
Supkampion: Jong Holland
Kategoria Senior
Kampion: Hubentut Fortuna
Supkampion: Vesta
Komishon Femenino i FFK ta felisitá tur e ekiponan aki i ta gradisí tur hungadó, entrenadó, mayor, rèfri i tur ku a kontribuí di un manera òf otro pa kampionato aki ta unu eksitoso!
WILLEMSTAD — Nos selekshon nashonal tin algun kompromiso sumamente importante durante e CONCACAF Nations League. Nos promé partido lo tuma lugá 3 di yüni aki na Kòrsou kontra Honduras den Stadion Ergilio Hato pa 8’or di anochi. Despues di e partido aki nos selekshon lo biaha pa Honduras i Canada pa nos 2 otro kompromisonan pa kompletá e buèlta aki.
Despues ku nos kuerpo tékniko enkabesá pa Guus Hiddink i Art Langeler a bira konosí, awor nos ta anunsiá e lista di 23 hungadó ku lo partisipá na nos enkuentro kontra Honduras.
E siguiente hungadónan lo forma parti di nos selekshon;
Preparashonnan ta kontinuá pa nos selekshon nashonal su promé kompromiso durante di e CONCACAF Nations League pa 2022, dia 3 di yüni pa 8’or di anochi den Stadion Ergilio Hato kontra Honduras.
WILLEMSTAD — Federashon Futbòl Kòrsou a anunsia ku Sr. Ramiro Griffith ta e presidente nobo di FFK miéntras Eric Fraay i Sendie Ortela a keda elegí komo delegadonan pa representá ekiponan di Liga MCB Segundo i Terser Divishon.
WILLEMSTAD — Aña pasá nos selekshon nashonal femenino kategoria U-17 a terminá komo number 1 den su pul i a klasifiká pa e segundo buèlta di e CONCACAF Women’s U-17 Championship. P’esei nos selekshon ta rumbo pa Repúblika Dominikana pa enfrentá sea Merka òf Costa Rica (dependiendo di nan resultado awe) durante nos kompromiso di e segundo buèlta di a kampionato aki. Nos partido lo tuma lugá 30 di aprel pa 4’or di atardi den Stadion Cristóbal Panamerican aya na Repúblika Dominikana.
Nos selekshon di dama kategoria U-17 ya tin algun siman ta preparando i ta praktiká pa saka kara di Kòrsou un biaha mas. Un grupo di 19 hungadó ta forma parti di nos selekshon nashonal femenino kategoria U-17. E hungadónan aki ta hungadónan aktivo den Kampionato Femenino pero tambe tin 2 hungadó residensiá na Hulanda i Boneiru ku a bin pa reforsá nos selekshon.
E selekshon a wòrdu dirigí pa Sr. Reynold Mercera ku ta wòrdu asistí pa
Sr. Heinrich Roojer komo asistente tékniko i Sr. Pablo Mark Alomá komo entrenadó di portero. Sra. Dianne Winklaar huntu ku Sra. Denice Linger Berggraaf ta e masahistanan miéntras dòkter Eartha Helstone tambe ta kompañá e selekshon.
E hefe di delegashon ta Sra. Fabi Constansia, miembro di direktiva di FFK.
E siguiente hungadónan ta forma parti di nos selekshon;
Preparashonnan ta kanando den ful swing pa nos damanan ku lo biaha próksimamente pa Repúblika Dominikana pa nos kompromiso durante e segundo buèlta di e CONCACAF Women’s U-17 Championship.
WILLEMSTAD — Tur aña KNVB ku UEFA ta brinda oportunidat na entrenadónan femenino di Sürnam, Aruba, Boneiru, Kòrsou i Sint Maarten pa siguí kursonan pa siguí desaroyá nan abilidatnan futbolístiko. E biaha aki FFB ta tin e oportunidat pa organisá UEFA Assist Dutch Caribbean 2022 ku a tuma lugá di 16 pa 23 di aprel. Rignalda Hooi, Merrydiën Martina i Suryli Ipcedencia a biaha pa Boneiru pa partisipá na e kurso aki ku e meta pa ampliá nan konosementu di futbòl i pone den praktiká tur loke nan a siña pa engrandesé futbòl femenino aki na Kòrsou.
E kurso aki a tuma lugá di mainta pa atardi na un skol na Rincon i e tabata repartí den 2 parti. Parti mainta tur kursista tabata haña e parti teorétiko ku presentashonnan di Powerpoint. Parti atardi ta tin e parti práktiko ku un grupo di 49 hungadó femenino di Boneiru entre 9 pa 13 aña ku tambe a partisipá na e kurso p’asina pone den praktiká loke a duna durante e kurso. Tambe nan mester a hasi diferente tareanan den grupo i por último organisá un torneo, harma vèlt, analisá trainingnan i duna puntuashon na e hungadónan abase di nan prestashon.
Un total di 20 kursista a partisipá na e kurso aki ku a resultá un éksito.
Tur e kursistanan tabata di opinion ku e kurso tabata hopi interesante i bon hinká den otro pasó despues di e parti teorétiko, nan tabata pone den práktika tur loke nan a siña, riba e mesun dia pa despues evaluá e kosnan ku a bai ménos bon. Tambe tabata algu hopi grandi pa por a konosé e legendario Johan Neeskens personal i a tuma lès serka 2 di e mihó entrenadónan na Hulanda ku ta Henriette de Reus i Corina Dekker.
Pues nan ta tin un eksperensia úniko i hopi informativo.
Awor futbòl femenino ta konta ku 3 entrenadó bon prepará pa siguí desaroyá nos damanan i yuda engrandesé futbòl femenino aki na Kòrsou.
FFK ta felisitá tur e entrenadónan aki ku nan diploma di UEFA Assist Dutch Caribbean 2022!
WILLEMSTAD — Manera ya ta konosí den e lunanan benidero nos selekshon nashonal lo tin algun partido sumamente importante na kaminda. Despues ku nos selekshon ta tin algun luna inaktivo, direktiva di Federashon Futbòl Kòrsou huntu ku e departamento tékniko a bin ta traha duru p’asina yega na un kuerpo tékniko pa dirigí nos selekshon nashonal durante nos próksimo kompromisonan.
Durante vários dia di entrevista ku diferente kandidato ku hopi potensial pa bira e próksimo direktor tékniko di nos selekshon nashonal, FFK a yega na e siguiente konstelashon ku lo dirigí nos selekshon durante nos próksimo kompromisonan.
| Kuerpo tékniko | |
| Sr. Guus Hiddink | Direktor tékniko |
| Sr. Art Langeler | ‘Bonds coach’ |
| Sr. Gillian Justiana | ‘Assistant coach’ |
| Sr. Gersinio Constansia | ‘Assistant coach’ |
| Sr. Quentin Jakoba | ‘Assistant coach’ |
WILLEMSTAD — Manera ya ta konosí, nos promé kompromiso durante e di 2 buèlta di Nations League lo ta kontra Haiti dia 7 di sèptèmber próksimo pa 6’or di atardi den Stadion Ergilio Hato.
Nos selekshon tin un total di 4 partido ku nan mester hunga, di kua 2 ta na kas i 2 afo. Despues di di e partido kontra Haiti dia 7 di sèptèmber, nos lo biaha bai Haiti kaminda 10 di sèptèmber nos lo bolbe topa Haiti. Den luna di òktober nos ta enfrentá Costa Rica na Costa Rica i 14 di novèmber nos lo hunga na kas kontra Costa Rica pa di 2 biaha.
Despues di a públika e lista di 39 hungadó ku a forma parti di e pre-selekshon, nos entrenadó Sr. Remko Bicentini huntu ku su staf a yega na e lista definitivo di e 23 hungadónan ku lo partisipá na e partidonan aki.
E siguiente hungadónan ta forma parti di nos selekshon ku lo mira akshon durante e segundo buèlta di Nations League;
Mirando ku tin 2 wega ku lo tuma lugá na Kòrsou, e biaha aki tambe nos lo bende karchi pa un wega òf e pakete pa ámbos partido. Karchinan ya ta optenibel na FFK bou di ora di ofisina, Beep Beep, Botika Mampuritu, pòmp di gasolin Sta Maria i na 4th of July snèk na Barber.
E preisnan pa e diferente paketenan pa sekshonnan ta lo siguiente:
E kolekshon nobo di suèter di nos selekshon, ku ta Nike original, a yega FFK!
Aparte di e suèternan nos a risibí ‘jacket’ i karson di ‘traingspak’ largu tantu pa mucha komo pa adulto na diferente ‘size’ i koló.
E preisnan di nos kolekshon nobo di merkansia di nos selekshon nashonal ta lo siguiente;
E ‘size’ nan di mucha ta kore di XS te L miéntras di adulto ta kuminsá na S i ta yega te XXL.
Tur esaki optenibel na FFK bou di ora di ofisina.
Nos selekshon tin kompromisonan sumamente importante na kaminda i nos hungadónan ta konta ku bo, komo e di 12 hungadó, pa sigui apoyá i sostené nan!